Digitalizazio Plana Haur Hezkuntza, Lehen Hezkuntza, Bigarren Hezkuntza eta Batxilergoko ikastetxeei digitalizazioa hezkuntzaren eraldaketarako eta etengabeko hobekuntzarako palanka gisa erabiltzen laguntzeko plana da. Plan honen asmoa da gizarte- eta hezkuntza-testuinguru berriak jo dizkigun erronkei behar bezalako erantzutea ematea. Honako hauek bultzatuko ditu: material berriak sortzea; hezkuntza-komunitateko pertsona guztien gaikuntza digitala bultzatzea; azpiegitura berriak martxan jartzea; ikaskuntza-prozesua errazten duten tresna berriak sortzea; eta ikaskuntzarako digitalizazio-prozesuen esperientzia aurreratuak bultzatzea.

Teknologia digitaletan egindako aurrerapen handiek berresten dute beharrezkoa dela berrikuntzekin lotutako erronka teknologiko, etiko eta sozialei erantzutea, horiek aldarazten ari baitira gure bizimodua eta lan egiten dugun modua. 

Teknologia digitalek gure bizitzako esparru guztietan duten presentzia dela eta, egokitu ez ezik, aldaketarako eta berrikuntzarako eragile ere bihurtu behar du euskal hezkuntza-sistemak. Ikasleek, langileek eta hezkuntza-erakundeek aukera izan behar dute teknologia digitalek irakaskuntzarako, ikaskuntzarako, komunikaziorako eta sormenerako eskaintzen dituzten aukera ugariak aprobetxatzeko.

Testuinguru horretan, Euskal Hezkuntza Sistema Digitalizatzeko Planak teknologia digitalak hezkuntza-maila guztietan sartzea planteatzen du, irakaskuntza- eta ikaskuntza-praktikak hobetzeko eta dibertsifikatzeko eta gaitasun digitalak garatzeko duen ahalmenaz baliatzeko.

Hezkuntza Sailak Digitalizazio Planaren gaineko kontraste prozesu partehartzailea bultzatu du eta ikastetxe publikoetako zuzendarien ekarpenak zein irakasleek prestakuntza beharren inguruan lehenetsiriko alderdiak kontuan hartu ditu.